Արա Շահվերդեան. «Իրանը մշտապէս վստահելի երկիր է եղել ՀՀ-ի համար»
Արա Շահվերդեան. «Իրանը մշտապէս վստահելի երկիր է եղել ՀՀ-ի համար»

«ԱԼԻՔ», Ա. Է. -Վերջին օրերին Իրանի վարած աշխոյժ քաղաքականութիւնը երկրի հիւսիս-արեւմտեան սահմանին՝ կոշտ եւ կտրուկ պատասխան է ենթադրում ադրբեջանա- թուրքական դաշինքին, որով պատգամ է փոխանցւում, որ որեւէ ոտնձգութիւն հայ-իրանական սահմանի երկայնքով խիստ հակահարւածի է արժանանալու:

 

Արա Շահվերդեան.
«Իրանը մշտապէս վստահելի երկիր է եղել ՀՀ-ի համար»

«ԱԼԻՔ», Ա. Է. -Վերջին օրերին Իրանի վարած աշխոյժ քաղաքականութիւնը երկրի հիւսիս-արեւմտեան սահմանին՝ կոշտ եւ կտրուկ պատասխան է ենթադրում ադրբեջանա- թուրքական դաշինքին, որով պատգամ է փոխանցւում, որ որեւէ ոտնձգութիւն հայ-իրանական սահմանի երկայնքով խիստ հակահարւածի է արժանանալու:

Մեր տարածաշրջանում տեղի ունեցող զարգացումների ֆոնին, ինչպէս նաեւ Իրանի արտգործնախարար Աբդօլլահեանի գլխաւորած պատւիրակութեան այցին ու Իրանի կողմից իրականացւող քայլերին անդրադարձաւ Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, ում հետ այսօր մենք փորձեցինք որոշ մանրամասներ ճշտել Իրանի արտգործնախարարի Հայաստան այցից, որի պատւիրակութեան կազմում էին նաեւ իրանահայ մեր երկու պատգամաւորները:

Կարեւորելով այցը այս աշխարհաքաղաքական բարդ ժամանակահատւածում, պատգամաւորը առանձնացրեց Կապանում Իրանի հիւպատոսութեան բացումը, որը հերթական պատասխանն է Ադրբեջանին, շեշտելով, որ «Զօրավարժութիւնը իմ կարծիքով պատահականութիւն չէր եւ դրան յաջորդեց պարոն Աբդօլլահեանի եռօրեայ այցը Հայաստան: Նախապէս նախատեսւած էր երկօրեայ այց, բայց յագեցած օրակարգերը պարտադրեցին եռօրեայ տրամաբանութիւն»:

Հայաստանի արտգործնախարարի հետ հանդիպումը տպաւորել է խորհրդարանի պատգամաւորին այն առումով, որ այստեղ երկողմ յարաբերութիւններում առկայ մի շարք թիւրիմացութիւններ հարթւել են: «Աբդօլլահեան-Միրզոյեան հանդիպումը իմ կարծիքով շատ դրական էր, քանի որ նախ օրակարգային երկկողմ բազմավեկտոր հարցեր քննարկւեցին, ապա պաշտօնական ձեւաչափից դուրս էլ քննարկւեցին հարցեր, որոնք թիւրիմացութիւնների տեղիք էին տւել, եւ սա լաւ առիթ հանդիսացաւ դրանք պարզաբանելու»,- նշում է պարոն Շահվերդեանը:

Անդրադառնալով այսօր աշխարհա-քաղաքական այս իրավիճակում բարեկամ երկիր Իրանի դիրքորոշումներին եւ նախաձեռնւող պատասխան քայլերին ու հայաստանեան կողմի դիրքորոշումներին, որոնք բնականօրէն բխելու են հէնց Հայաստանի անվտանգութեան շահերից, պատգամաւորը մէկ անգամ եւս կարեւորութեամբ մատնանշեց Իրանի արտգործնախարարի յայտարարութիւնը, որը որպէս կարմիր գիծ յստակ շեշտւել է՝ «Չեն հանդուրժելու սահմանային որեւէ փոփոխութիւն»:

«Այսօրւայ դրութեամբ շատ ցանկալի է, որ Հայաստանի կառավարութիւնը եւս անդրադառնայ, որ Իրանը միակ յուսալի երկիրն է, որին կարելի է վստահել, ինչպէս դարեր վստահելի է եղել, որպէս բարեկամ երկիր: Ինչպէս որ Իրանի արտգործնախարարը շատ յստակ իր խօսքում մատնանշեց, որ Հայաստանի անվտանգութիւնը Իրանի անվտանգութիւնն է, Հայաստանի ապահովութիւնը Իրանի ապահովութիւնն է եւ սահմանները ամէն գնով մենք անսասան ենք պահելու, դա մեր կարմիր գիծն է: Եւ իմ համար շատ հետաքրքիր էր, որ այդ պատգամը, որը փոխանցեց Աբդօլլահեանը, Հայաստանի ժողովուրդը ամբողջ էութեամբ անմիջապէս ներծծել է իր մէջ. դրա արձագանգը մենք զգում էինք մեր իւրաքանչիւր հանդիպման ընթացքում», իսկ պատգամաւորների մասնակցութեամբ Իրանի արտգործնախարարի հանդիպումներ կայացել են նաեւ ոչ պաշտօնական շրջայցերում:

«Իրանը այսօր հզօր թիկունքով կանգնած է եւ որեւէ կերպ իրաւունք չի տայ որեւէ ոտնձգութիւն՝ թէ՛ ադրբեջանա- թուրքական, եւ թէ՛ առաւել եւս որեէ երրորդ երկրի ներխուժում այդ ռազմավարական նշանակութիւն ունեցող սահմաններում»,- կարեւորութեամբ եզրակացրեց Արա Շահվերդեանը:

«Ալիք» օրաթերթ

Հաղորդակցւել Արա Շահվերդեանի հետ հէնց հիմա

Ներկայացրէք Ձեր տեսակէտը: Ուղէք հարցեր ու ստացէք խորհրդատւութիւն:

Հանրային հաղորդակցութիւն